Vullisterreinouditprojek: Ermelo toon agteruitgang
“Die toestand van die vullisterrein het baie verswak en hou ’n groot gesondheidsrisiko vir die gemeenskap in.”
Die AfriForum-tak in Ermelo het onlangs ’n vullisterreinoudit by die plaaslike vullisterrein gedoen. Die oudituitslag toon dat dié terrein aan slegs 52% van die minimum vereistes voldoen, maar dat dit reeds ’n groot agteruitgang is op die 82%-prestasie wat die terrein in 2015 behaal het.
Dié oudit vorm deel van AfriForum se nasionale vullisterreinouditprojek wat vullisterreine aan die hand van minimum vereistes evalueer soos in die Wet op Nasionale Omgewingsbestuur: Vullis (art. 59 van 2008) uiteengesit. AfriForum het hierdie vereistes in 25 vrae verwerk en gebruik dan dié vrae om die vullisterreinoudit te doen.
“Die toestand van die vullisterrein het baie verswak en hou ’n groot gesondheidsrisiko vir die gemeenskap in,” sê Penny Coetzer, voorsitter van die omgewingsakeportefeulje van AfriForum se Ermelo-tak.
“Die Msukaligwa Plaaslike Munisipaliteit beskik ook oor die nodige bywet, beleid en lisensie, maar het geen afvalbestuursplan nie,” sê Johann Weber, AfriForum se streekskoördineerder vir Mpumalanga-Oos.
Ondersteun AfriForum se vullisterreinouditprojek: Teken die aanlyn petisie op AfriForum se webtuiste of SMS “Ermelo” na 45350 (R1).
Johann Weber
Streekskoördineerder: Mpumalanga-Oos
